بواسیر کیا ہے ؟

بواسیر میں مقعد کی رگوں کے منہ پر مسے پیدا ہو جاتے ہیں جن میں اکثر سوزش بھی ہوتی ہے۔ بواسیر سے کبھی اندر کی وریدیں متاثر ہوتی ہیں اور کبھی باہر کی وریدیں متاثر ہوتی ہیں۔ اگر باہر والی وریدیں متاثر ہوں تو بہت زیادہ درد ہوتا ہے لیکن ان کے ساتھ خون نہیں آتا۔ لیکن اگر اندرونی وریدیں متاثر ہو جائیں تو خون نکلتا ہے۔ بواسیر خونی ہو یا بادی بہر صورت کسی سزا سے کم نہیں۔

بواسیر کی وجوہات

بواسیر کی وجوہات میں سے چند ایک یہ ہیں  بے ترتیب اور بے وقت  کھانا، زیادہ تر بھنی ہوئی  اور مصالحہ دار اشیاء کھانا، سخت جگہ پر زیادہ دیر بیٹھنا ، بازاری اور ڈبوں میں محفوظ کئے گئے کھانے کھانا ۔ قبض بھی ایک مسئلہ ہے جو کہ  مقامِ مقعدسے متعلقہ ہے۔ عام طور پر قبض کو ستر بیماریوں کی وجہ بیان کیا جاتا ہے۔ قبض بذات خود بواسیر نہیں ہوتی بلکہ بواسیر کی ایک علامت ہوتی ہے اور بواسیر ہونے کی اصل وجہ بھی۔ پہلے قبض کی وجہ سے مرض کا آغاز ہوتا ہے اور پھر یہی قبض اس مرض کو ترقی دیتی ہے۔

بواسیر کی علامات و نشانیاں

بواسیر خونی ہو یا بادی دونوں صورتوں میں مریض کیلئے عذاب ہوتی ہے۔ شدتِ درد کی وجہ سے مریض نہ چل پھر سکتا ہے نہ اٹھ بیٹھ اور لیٹ سکتا ہے۔ ہر صورت میں مریض بے چینی اور اضطراب کا شکار رہتا ہے۔ یہ بیماری مسوں کے ساتھ اور مسوں کے بغیر بھی ہو سکتی ہے۔ اس مرض میں اکثر درد، جلن، چبھن اور مقعد میں سرسراہٹ ہونا پایا جاتا ہے۔