الرجی کیا ہے؟

الرجی یا بڑھی ہوئی حساسیت ایک ایسی خرابی ہے جو کسی بھی بیرونی شے کے خون میں شامل ہو جانے سے اس کے خلاف رد عمل کے طور پر پیدا ہوتی ہے۔ اس شے کے رد عمل میں جو کیفیت پیدا ہوتی ہے اسے الرجی کہتے ہیں۔

الرجی کی وجوہات

الرجی پیدا کرنے والے عوامل کو الرجن کہا جاتا ہے۔ الرجن کئی اقسام کے ہو سکتے ہیں مثلاً آب و ہوا، خوشبو وغیرہ۔ پھولوں کی خوشبو بہت سے لوگوں کو بھاتی ہے اور چند ایک افراد کسی خاص پھول کی خوشبو سے حساسیت کے باعث اس سے بیمار ہو جاتے ہیں۔

الرجن مادے ہماری روزمرہ کی خوراک میں مثلاً انڈہ، مچھلی، کیکڑے، جھینگے، دالیں اور یہاں تک کہ دودھ میں پائے جاتے ہیں۔ اس کے علاوہ اینٹی بائیو ٹکس، خواب آور ادویات، گردو غبار، دھواں، پھول، خوشبویات اور بہت سی اشیاء جسم انسانی پر مختلف قسم کے اثرات مرتب کرنے کا باعث ہیں۔

بعض دفعہ ماحول اور غذا میں یہ کیفیت طاری کرنے والے بے شمار مادے جو موجود ہیں وہ حساس جسم رکھنے والے افراد کو مختلف درجوں کی حساسیت میں مبتلا کرتے ہیں ۔یہ معمولی نوعیت کی کیفیت بھی ہو سکتی ہے اور شدید نوعیت کی بھی ہو سکتی ہے۔ یہ مادے ہوا میں بھی موجود ہو سکتے ہیں اور غذاؤں میں بھی پائے جاتے ہیں۔

 الرجی کی علامات و نشانیاں

الرجی کی علامات میں سے چند ایک یہ ہیں۔ الرجی کی وجہ سے نزلہ، زکام، چھینکیں یا تنگی تنفس یعنی سانس لینے میں دشواری اور جلدی ابھار وغیرہ شروع ہو جاتے ہیں۔