حیض کی بے قاعدگی کیا ہے ؟

ایام ِ حیض کی بے قاعدگی  آج کل عام مسئلہ ہے۔ ایام ِ حیض میں خارج ہونے والا مادہ دراصل رحم یعنی بچہ دانی کا فضلہ ہوتا ہے۔ ماہواری کا مقدار میں کم آنا، مقررہ ایام سے کم یا زیادہ ہو جانا، ماہواری سے قبل یا اس کے دوران شدید تکلیف کا ہونا، یہ تمام ایام کی بے قاعدگیاں کہلاتی ہیں۔

حیض کی بے قاعدگیوں کی وجوہات

خواتین کو یہ شکایات کیوں ہوتی ہیں؟ اس کے کئی اسباب ہیں، جیسے غذا میں بعض ضروری عناصر کی کمی ، جس کی وجہ سے جنسی ہارمونز کی غیر متناسب تشکیل ہوتی ہے۔ رحم کی سوجن، ایام کے دنوں میں سردی لگنے یا بارش میں بھیگنے سے حیض کا نظام درہم برہم ہو جاتا ہے۔حیض کی ان تکالیف میں سے ایک یہ ہے کہ حیض سے دو تین دن پہلے درد شروع ہو جاتا ہے یہ اس عمل کا اظہار ہے کہ بیضہ دانیاں صحیح طور پر کام نہیں کر رہیں۔ حیض کی اس بے قاعدگی کا سبب جسم میں زہروں کا پیدا ہو جانا بھی ہے۔ غلط طرزِ زندگی اور اعصابی تھکاوٹ بھی اس کا ایک سبب ہے۔ درد یا تو حیض شروع ہونے سے دو، تین روز قبل شروع ہو جاتا ہے یا اس کے دوران ہوتا ہے۔ حیض کے خون کا زیادہ آنا بھی ایک عام بیماری ہے۔ کئی خواتین کثرتِ حیض کی بیماری میں مبتلا ہوتی ہیں۔ یہ بیماری خصوصاً کیلشیم کی کمی کے باعث ہوتی ہے۔ اس کا بنیادی سبب جسم میں زہریلے مادوں کی موجودگی ہوتی ہے۔

حیض کی بے قاعدگی کی علامات و نشانیاں

واضح ہو کہ حیض کے نظام میں خلل کے باعث عورت بانجھ بھی ہو سکتی ہے۔ علاوہ ازیں اس فطری نظام کی خرابی سے عورت کا جسم پھول کر موٹا اور بھدا ہو جاتا ہے۔ طبیعت ہمہ وقت مکدر، پریشان اور بوجھل رہتی ہے۔ پیڑو میں درد ہوتا ہے، چہرے پر چھائیاں اور داغ دھبے پڑ جانے سے حسن و شگفتگی سے محرومی ہو جاتی ہے۔ لہٰذا حیض کی اس بے قاعدگی کا علاج اور سدِّ باب شروع ہی سے کرنا چاہئے تاکہ مقصودِ زندگی حاصل ہو۔ اکثر نوجوان لڑکیاں شرم و حیاء کی وجہ سے اپنی اس تکلیف کا ظاہر نہیں کرتیں کہ انہیں حیض کی بے قاعدگی لاحق ہے، نتیجہ یہ ہوتا ہے کہ کئی سالوں تک وہ اولاد کی نعمت سے محروم رہتی ہیں۔