گردے  و مثانہ کی پتھری کیا ہے؟

جب کوئی ٹھوس مادہ گردہ میں پروان پاتا ہے تو اسے گردہ کی پتھری کہتے ہیں۔ عمومی طور پر پتھریاں گردوں میں ہی بنتی ہیں اور بعد میں مثانہ کی طرف چلی جاتی ہیں۔ ایک چھوٹی پتھری آسانی کے ساتھ بغیر کوئی علامت ظاہر ہوئے گردے سے مثانہ تک پہنچ جاتی ہے۔ اور اگر پتھری بڑی ہو چکی ہو یعنی پانچ ملی میٹر تک تو ایسی پتھری پیشاب کے اخراجی راستے میں رکاوٹ کا باعث بن کر پیٹ کے نچلے حصے اور کمر میں شدید تکلیف پیدا کرتی ہے۔ پتھری کی وجہ سے متلی و قے، پیشاب میں خون یا سخت تکلیف کے ساتھ پیشاب خارج ہوتا ہے۔

گردہ و مثانہ کی پتھری کی وجوہات

گردوں میں بننے والی پتھریاں زیادہ تر قدرتی اجزاء اور ماحول کی سبب بنتی ہیں۔  ان کے علاوہ کیلشیم کی بڑھی ہوئی مقدار، موٹاپا، بازاری کھانے، کیلشیم کی گولیاں، گلے کی خرابی، نقرس اور پانی کم پینا بھی اس کے اسباب میں شامل ہے۔گردے میں پتھری تب بنتی ہے جب پیشاب میں نمکیات کی مقدار زیادہ ہوتی ہے۔ گردے نیفرونز کی چھوٹی چھوٹی نالیوں کے ذریعے یہ زائد مادے جسم سے خارج کر دیتے ہیں۔

 لیکن بعض اوقات یہ رسوبات ان نیفرونزمیں جم کر رکاوٹ پیدا کر دیتی ہیں۔ جس کی وجہ سے کیلشیم اور دیگر رسوبات جم کر پتھری بن جاتی ہیں۔ پتھری چھوٹی بھی ہو سکتی ہے اور بڑی بھی۔ایک بھی ہو سکتی ہے اور زیادہ بھی۔ مثانہ میں پتھری نہیں بنتی بلکہ گردہ ہی سے پیشاب کے راستے مثانہ میں جمع ہو جاتی ہیں۔ اس کا علاج آپریشن کے ذریعے بھی کیا جاتا تھا لیکن طبِ یونانی صدیوں سے اس کا علاج جڑی بوٹیوں سے بڑی کامیابی سے کرتی چلی آ رہی ہے۔

گُردہ کی پتھری کی علامات و نشانیاں

گردہ و مثانہ میں پائی جانے والی پتھریوں کی علامات و  نشانیاں کچھ یوں ہوتی ہیں کہ شدید نوعیت کا کمر  اور پیٹ کے نچلے حصے میں درد ہوتا ہے۔ پتھری کی وجہ سے بعض اوقات پیشاب کے ساتھ خون بھی آتا ہے۔  اس کی وجہ قے  بھی ہو سکتی ہے۔ پیشاب کرنے پر تکلیف کا احساس ہوتا ہے۔