چنبل کیا ہے ؟

چنبل بھی جلد پر رونما ہونے والا ایک ابھار ہے، جو ہلکی ہلکی  سوزش اور جلن پیدا کرتا رہتا ہے۔ یہ آبلہ بن کر ایک کھرنڈ کی شکل اختیار کر لیتا ہے۔ یہ جلدی بیماریوں میں ایک نہایت تکلیف دہ بیماری ہے جو جلد کی ساخت پر اثر انداز ہوتی ہے۔ گویا یہ جسمانی نظام کا ایک زہریلا مواد ہے جو جسم کے کسی بھی حصے پر اثر انداز ہوتا ہے۔ جسم کے کسی حصے پر چنبل اپنی شدت کے درجے پر پہنچ جائے تو وہ حصہ سُرخ ہو جاتا اور سُوجن بھی ہو جاتی ہے۔

چنبل کی وجوہات

چنبل لاحق ہونے کا اصل سبب تو خون کی تیزابیت کا غلبہ ہے لیکن اس کے اور بھی کئی اسباب ہیں۔ تیزابیت پیدا کرنے والی غذائیں اور دوائیں بکثرت استعمال کرنے کے نتیجے میں اکثر چنبل ہو جایا کرتی ہے۔ بعض خواتین کو کپڑے دھوتے وقت کسی صابن یا واشنگ پاؤ ڈر کی وجہ سے ہاتھوں میں چنبل ہو جاتی ہے۔ بعض لوگوں کو انگوٹھی کی وجہ سے انگلیوں کے گرد چنبل ہو جاتی ہے کیونکہ انہیں کسی خاص دھات سے الرجی ہوتی ہے۔ تاہم چنبل کا حقیقی سبب یہ ہے کہ بعض فالتو مادے پیشاب اور پاخانے کے ساتھ، بعض سانس کے ساتھ اور بعض مادے پسینے کے ساتھ جلد کے مساموں اور دیگر سوراخوں سے  پوری طرح نہیں نکل پاتے۔ اگر جلد کے مسام معمول کے مطابق کام نہ کریں تو گندے مادوں سے آلودہ پسینہ چنبل ، مہاسے ، کیل اور پھوڑے نکلنے کا باعث بنتا ہے۔

چنبل کی علامات و نشانیاں

جلد پر باریک باریک چھالے ابھر آتے ہیں جن میں جلن کا احساس ہوتا ہے۔ اگر یہ چھالے پھٹ جائیں تو ان میں سے ایک قسم کا مواد نکل کر جسم کے اوپر جم جاتا  ہے۔ اس طرح جسم پر ایک کھرنڈ سا بن جاتا ہے۔ رات کو جب جسم کو بستر کی گرمی پہنچتی ہے تو مرض میں مزید شدت پیدا ہو جاتی ہے۔ چنبل کے تمام مرحلوں میں کھجلی ہونا یقینی امر ہے۔ سوزش یا کھجلی ہونے پر مریض اسے ملتا ہے تو مندمل ہونے کے امکانات دور ہو جاتے ہیں، کھجلانے سے یہ مرض نہ صرف پھیلتا ہے بلکہ خشک ہونے اور کھرنڈ بننے کا مرحلہ بھی طویل تر ہو جاتا ہے۔