کیل چھائیاں اور داغ دھبے کیا ہیں؟

کیل چھائیاں اور داغ دھبے ایسی کیفیت کو کہتے ہیں جب جلد پر بالخصوص چہرے پر جلن دار اور پیپ والے دانے نمودار ہو جائیں۔ یہ عموماً اوائل عمری میں جب جوانی کی بہاریں شروع ہوتی ہیں وقوع پزیر ہوتے ہیں۔

کیل چھائیوں، داغ دھبوں کی وجوہات

کیل چھائیوں داغ دھبوں کی بنیادی وجہ فسادِ خون ہے۔ خون کی غیر طبعی حرارت یا پھر خون میں زہریلے مواد کی آمیزش سے یہ بیماری لاحق ہوتی ہے۔ لہٰذا جب تک اندرونی استعمال کی ادویہ سے خون کی تطہیر نہ کی جائے بیماری میں افاقہ نہیں ہوتا۔ یہی وجہ ہے کہ مرہم  اور کریمیں وغیرہ عارضی طور پر سطح کو ٹھیک تو کر دیتی ہیں مگر بیماری کی اصل وجہ اندر ہی رہتی ہے۔  کیل چھائیوں داغ دھبوں کی وجہ سے جلد کا نازک پن اور تر و تازگی ختم ہو جاتی ہے۔

کیل چھائیوں، داغ دھبوں کی علامات و نشانیاں

کیل چھائیوں اور داغ دھبوں کی علامات ونشانیاں کچھ اس طرح ہیں کہ چہرے یا ماتھے پر سفید سُرخی مائل دانے کبھی چھوٹے کبھی بڑے نمودار ہوتے ہیں۔ بعض اوقات یہ جڑ والے ہوتے ہیں جن کو کیل کہتے ہیں۔ کھلے مسام والے کو بلیک ہیڈ کہتے ہیں اور بند مسام والے کو وائٹ ہیڈ کہتے ہیں۔ اور کچھ تو انتہائی تکلیف دہ پیپ سے بھرے ہوئے بدنُما جلد کی اندرونی جانب اُبھرے ہوئے ہوتے ہیں۔